නියෝජ්‍ය විදුහල්පති පණිවිඩය

ඇසූ පමණින් වටාපත නම සිහිවන්නේ ගමක නමක් නොව භික්ෂූන් වහන්සේලා පවන් සලනා වටාපතයි. ඈතින් පෙනෙන්නේ කිරිබත්ගල කඳු යායයි. එය මනරම්ය. සොඳුරු ජනප්‍රවාද ඒ හා බැඳී ඇත. ඒ නිසාම වටාපත ප්‍රකටය. ඒ පරසිඳු බවට හේතු වූයේ වටාපත මහා විද්‍යාලයයි. බොහෝ නැණවතුන් බිහි කළ වටාපත මහා විද්‍යාලය මුලින් හඳුන්වා ඇත්තේ සුමිත්තානන්ද විද්‍යාලය නමිනි. 1930 වර්ෂයේ පාසල ආරම්භ වන්නේ පූජනීය පැල්මඩුල්ල සිරි සුමිත්තානන්ද නාහිමියන්ගේ අනුශාසකත්වයෙන් ය. උන්වහන්සේගේ මහා සේවාවන්ගෙන් එකක් වන්නේ මේ සුමිත්තානන්ද විදුහලයි. එදා වටාපත මහ විදුහලට එම නම රැඳුනේ උන්වහන්සේට ගෞරවයක් වශයෙනි. නමුදු වර්ථමානයේ නාහිමියන්ගේ නම ඉවත්ව වටාපත මහා විද්‍යාලය  නමින් නම් දී ප්‍රකටව ඇත. එයට හේතුව කුමක්දැයි විමසිය යුත්තකි. කෙසේ නමුත් මේ වන විට කලාපයේ, පලාතේම පමණක් නොව රටටම අප පාසලෙන් සිදුවන සේවය අමිලය,නිමලය. විවිධ දක්ෂතා පිරි දරුදැරියෝ  අනාගතය තනා ගන්නට පාසල්  මව් තුරුලේ දැවටෙති. එය ගමට අභිමානයකි. අනාගතයේ වටාපත මහා විදුහල් මෑණියන්ට ගුණ නැණ පිරි දරුකැළක් බිහිකරන්නට හැකිවේවායි පතමි.

 

නියෝජ්‍ය විදුහල්පති,

ර/නිවි/වටාපත මහා විද්‍යාලය